LINE EW-UAS - an experimental unmanned system for coastal surveillance using ESM technology

Det er aukande interesse for bruk av dronar og andre ubemanna system, både frå sivilt og miltært hald. Ikkje minst gjeld dette i samband med teknologiar for overvaking og sikring. Eit eksempel på eit slikt bruksområde er overvaking av kystområde. Alle skip over ein viss storleik er pålagde å kontinuerleg sende ut eit Automatic Identification System (AIS) signal som identifiserer dei for omverda. Ikkje alle gjer dette slik dei skal, noko som kan vere ein indikasjon på at ein ynskjer å passere usett. Eit system som verifiserer at eit skip faktisk er der det hevdar i AIS signalet, eller som lokaliserer eit skip der det ikkje fins AIS spor vil derfor kunne vere av stor operativ nytte. Electronic Support Measures (ESM) er teknologi for passiv innsamling og tolking av elektromagnetiske signal, slik som til dømes radarpulsar. To eller fleire ESM sensorar som samlar informasjon på ein koordinert måte er i stand til å geolokalisere ein radar. Eit skip som med viten og vilje forfalskar AIS signalet sitt er truleg ikkje villig til å ta risikoen forbunde med å samstundes slå av navigasjonsradaren, noko som gjer ESM-teknologi til ei mogleg løysing på problemstillinga i førre avsnitt. I og med at ESM sensorar er passive egnar dei seg også godt som nyttelaster i Unmanned Aerial Vehicles (UAV), der batteritid og storleik er viktige parameter. Denne rapporten skildrar eit komplett system for geolokasjon av roterande maritime navigasjonsradarar ved bruk av to UAV-ar utstyrt med kvar sin ESM nyttelast. Dei to nyttelastane registrerer radarpulsar frå kringliggande skip og sender puls-metadata vidare til ein bakkenode der informasjonen vert koordinert og presentert i verktøy som er kjende for operative avgjerdstakarar. Prosjektet kom i stand som eit tverrfagleg samarbeid mellom 8 ulike forskingsgrupper frå 5 ulike avdelingar ved Forsvarets Forskningsinstitutt (FFI), og har hatt som mål å setje lys på nokre av dei mogelegheitene og utfordringane ein står ovanfor ved bruk av ubemanna system generelt og i samband med Elektronisk Krigføring (EK) operasjonar spesielt. Dette har inkludert problemstillingar knytt til operasjon av UAVar og tilpassing av nyttelaster, 3D-printing, ESM-tekniske aspekt, kommunikasjon og infrastruktur rundt dette, sensornettverk samt etterbehandling av data og presentasjon av desse. Prosjektet demonstrerer at geolokasjon av roterande navigasjonsradarar er mogleg ved bruk av to små, rimelige ESM sensorar. Det vert vist døme på at ein gitt radar kan følgjas over tid, noko som stadfestar teknologien sitt potensial i samband med kystovervaking. Det vert også demonstrert ei fungerande, komplett datakjede: frå antenne til høgnivå presentasjonsverktøy i operasjonsrommet.