Information-Centric Networking for mobile military networks

Samandrag I dagens militære operasjonar er det nødvendig med ein informasjonsinfrastruktur som gjer det enkelt å dela store mengder informasjon. Det er vanskeleg å byggja slike nettverk, spesielt for mobile styrkar. Information-Centric Networking (ICN) er fellesnamnet på fleire forslag til nye nettverksarkitekturar som kanskje kjem til å verta ein del av teknologien for internett i framtida. ICN introduserer ein ny måte å finna informasjon i eit nettverk på ved å bruka namn som identifikator på informasjonen i staden for IP-adressa til sørvaren som produserer eller lagrar informasjonen. Dette kan gje betre samhandling mellom informasjonsinfrastrukturen og kommunikasjonsinfrastrukturen og setja nettverket i stand til å tilby kjappare og meir effektiv deling av informasjon. ICN har også nokre eigenskapar som kan vera fordelaktige for framtidige militære mobile nettverk. Støtte for kommunikasjon både til ei gruppe med mottakarar og til ein enkelt mottakar innanfor same arkitektur, og dessutan støtte for mobile plattformar og ustabile radiolinkar, er eksempel på fordelaktige eigenskapar. I denne rapporten studerer me denne nybrotteknologien for å kunne vurdera om teknologien bør koma i betraktning for ny arkitektur for mobile militære nettverk til det norske Forsvaret i framtida. Metoden me har brukt i arbeidet er ein kombinasjon av litteraturstudiar og eksperimentering med demonstrator. Me valde å byggja demonstratorane ved hjelp av Named Data Networking (NDN), som er ein populær ICN-arkitektur. Som ein del av arbeidet med å laga ein demonstrator har me utvikla eit tillegg til den opne NDN-kjeldekoden. Tillegget vårt gjev betre støtte for søk etter informasjon i mobile militære nettverk. Dette tillegget kan brukast som eit utgangspunkt for ytterlegare optimalisering av NDN-arkitekturen for slike nettverk. Me har studert korleis NDN kan betra effektiviteten og stabiliteten til mobile miltære nettverk, og me viser både potensielle fordelar ved bruk av slike arkitekturar i tillegg til kjente utfordringar. Me studerer spesielt metodar for å søkja etter informasjon i mobile miltære nettverk sidan denne funksjonen er viktig for å kunne styra effektiviteten til nettverket (effektiv ressursbruk) opp mot nødvendig motstand mot pakketap. Søkjemetoden er også viktig for at NDN skal kunne gje god støtte til informasjonsinfrastrukturen. Me har også gjort ein kvantitativ studie av NDN mot to relevante løysingar for tenesteorientert arkitektur for å vurdere kor effektiv NDN si støtte til informasjonsinfrastrukturen er. Me konkluderer med at NDN er interessant og bør studerast vidare, men at arkitekturen ikkje er moden. Studiane me har gjort, styrkjer trua vår på at denne arkitekturen har eigenskapar som kan vera nyttig i mobile miltære nettverk. Samtidig er det viktig å understreka at arkitekturen har utfordringar som må løysast før den kan brukast i operative nettverk. For eksempel må ein skalerbar namnestruktur på plass. Det er også nødvendig å støtte konfidensielt søk etter informasjon og dessutan effektive løysingar for søk etter informasjon i mobile militære nettverk. Me anbefaler å fortsetja å forska på denne arkitekturen for å finna løysingar på dei viktige utfordringane.