Faryab Survey - wave 6

Faryab Survey wave 6 vart gjennomført i oktober og november 2012. Spørjeskjemaet som vart nytta er utvikla av Forsvarets forskningsinstitutt (FFI) i samarbeid med det norsk-leia Provincial Reconstruction Team Maimanah (PRT Maimanah). Meiningsmålinga består av omlag 50 spørsmål som dekker dei tre hovudområda; tryggleik, utvikling og styresett, i tråd med strategiane som er lagt av norske myndigheiter og den NATO-leia International Security Assistance Force (ISAF). Totalt vart 1433 persona intervjua i Faryab. Desse var mellom 18 og 75 år. 44 % av respondentane svarer at Faryab utviklar seg i riktig retning, medan 40 % uttrykkjer det motsette. Samanlikna med tidlegare undersøkingar, representerer dette ei kontinuerleg negativ trend. Arbeidsløyse er det største problemet i Faryab og har vore det i alle seks undersøkingane. Det afghanske politiet vert sett på som ein viktig leverandør av tryggleik, og inntrykket av dei afghanske tryggleiksstyrkane er godt. Men data indikerer samstundes er det ei negativ trend. Inntrykket av tryggleikssituasjonen ser ut til å variere med årstida: Respondentane er meir positive til tryggleikssituasjonen om våren samanlikna med hausten. Det generelle inntrykket av styresmaktene er godt. Dette står noko i motstrid til det faktum at korrupsjon blant offisielle styresmakter vert sett på som eit problem. Det er verdt å merka seg at afghanarar kan vera ukomfortable med å kritisera myndighetar, og at kulturelle aspektar kan gjera korrupsjon meir akseptert. Meiningane til kvinner og menn i undersøkinga er relativt like med berre nokre små skilnader. Når ein samanliknar svara frå pashtunarar i Faryab med resten av svara frå Faryab finn me at pashtunarane er mykje meir misnøgd med deira eigen situasjon og utviklinga i deira område enn befolkninga generelt. Dei same trendane finn ein når ein samanliknar svara frå Ghormach, kor det berre var pasthunarar blant respondentane, med svara frå Faryab. Trass det store talet på respondentar som vart intervjua, har alle spørjeundersøkingar avgrensingar og uvisse. Dette gjeld særskilt for undersøkingar i eit konfliktområde, mellom anna av di det kan vera områder som er utilgjengelege for intervjuarane og dessutan kan nokre av respondentane vera redde for å uttrykka sine eigentlege meiningar.