Violent islamism in Turkey - an overview

Denne rapporten er ein førebels studie av valdeleg islamisme i Tyrkia. Målet er at rapporten kan fungere som eit startpunkt for vidare forsking. Valdeleg islamisme vaks fram på 1980-talet i Tyrkia. Sidan då har ei lang rekke åtak av særs ulik storleik og karakter blitt gjennomført av valdelege tyrkiske islamistar. Desse blir presenterte i ein kronologi i rapporten. Fire organisasjonar blir trekt fram som mest sentrale i denne perioden, her omtalte som al-Qaida, Hezbollah, IBDA-C og the Caliphate State. Desse fire har ulike ideologiske grunnlag, typiske mål og måtar å organisere seg på, men er alle sunnimuslimske, kritiske til den sekulære organiseringa av Tyrkia og står bak planlegging av og gjennomføring av valdelege åtak. Fleire av organisasjonane har samarbeida på ulike tidspunkt, og fleire medlemer har valt å skifte organisasjonstilknyting. Delar av aktiviteten til desse rørslene finn stad på internett, både gjennom tradisjonelle internettsider og gjennom meir sosiale media, som forum og Facebook. Eit kapittel av rapporten er via til tyrkiskspråkleg internettaktivitet og viser døme på korleis ulike valdelege islamistgrupper presenterer seg sjølv og kommuniserer på internett. Til slutt inneheld rapporten ein bibliografi. Denne er ei liste over kjeldene som er brukte i denne rapporten, men inneheld i tillegg meir litteratur som kan vere relevant for dei som skal forske vidare på valdeleg islamisme i Tyrkia.