3D hjelper kampfly å flyge betre
Ingeborg (22) var høgt og lågt med ein kampflymodell i sommar. Det var ei stimulerande simulering.
I sommar har eg fordjupa meg i eit spennande prosjekt innanfor flysimulering. Oppgåva mi har vore å forbetre ein eksisterande 3D-modell av eit kampfly. Det var lagt spesiell vekt på å gjere simuleringa av tilstanden og omgjevnaden til flyet meir nøyaktig. Slikt arbeid kan kome dei ekte flya til gode. Eg brukte eit eige verktøy for 3D-modellering og simulering for å få det til.
Eg studerer kybernetikk og robotikk ved NTNU. Det har vore til stor nytte her. Eg har kunna trekke på kunnskap om lineær algebra for å beskrive rørslene til flyet, og eg har brukt eit eige programmeringsspråk for å implementere simuleringa.
Simuleringar for komplekse system
Dette prosjektet har vekt interessa mi for korleis ein kan bruka simuleringar til å modellere komplekse system. Eg hugsar at eg allereie som barn var fasinert av korleis ting fungerer, og eg brukte mykje tid på å ta frå kvarandre ulike apparat. Denne nyfikna har følgt meg gjennom heile oppveksten, og den var nok ein viktig faktor for at eg valde å studere det eg no gjer.
Då eg byrja å studere var eg ganske open for ulike retningar. Eg var nøgd så lenge eg kunne kombinere matematikk, programmering og fysikk. Det eg har gjort her har vore ei spennande erfaring. Eg har lært mykje om både teoretiske konsept og det å arbeide praktisk.
Det mest spennande med sommarjobben ved FFI var at eg fekk jobbe med eit så konkret problem. Eg har fått innsikt i korleis forskinga går føre seg i praksis, og eg har lært mykje om dei utfordringane som forskarane står overfor. Det har også vore veldig motiverande å vere del av eit team som jobbar saman mot eit felles mål.
Eg blei veldig godt teken imot av vegleiarane mine. Dei har vore både tolmodige og hjelpsame. Dei har heile tida vore tilgjengelege for å svare på spørsmål og med å gi meg tilbakemeldingar på arbeidet mitt. Eg har spesielt sett pris på at dei har utfordra meg til å tenke nytt, og utvikle meg.
Sosial og lærerik sommarjobb
Når eg ser framover vonar eg å kunne halde fram med forsking innanfor eit felt som kombinerer datavitskap og fysikk. Eg er spesielt interessert i å jobbe med prosjekt som har ein positiv innverknad på samfunnet.
Det sosiale miljøet ved FFI har også vore veldig fint. Eg er blitt kjend med mange andre studentar. Det har vore inspirerande å høyre om arbeidet deira og å diskutere ulike faglege tema. Mykje var berre gøy: Ein medstudent og eg fekk vere med på en liten testtur med helikopter over delar av Oslo. Det hadde ikkje direkte relevans til oppgåva mi, men vi fekk prøve kamerautstyret om bord, og den andre sommarstudenten fekk teste rekkevidda på det han hadde utvikla.
Eg er veldig takksam for å ha hatt denne sommarjobben. Det har vore ei fantastisk oppleving som har styrkt interessa mi for forsking. Erfaringane eg har fått i sommar vil vere til stor nytte for meg i den vidare akademiske karrieren min, det er sikkert.